Sana Khan's marriage to Maulana Anas of Gujarat bids farewell to Bollywood, video goes viral on |
|
|
گجرات کے مولانا انس سے بالی ووڈ کو الوداع کہنے والی ثنا خان نے کی شادی، سوشل میڈیا پر وائرل ہوئی ویڈیو
بالی ووڈ اداکارہ ثناخان نے شادی کرلی ہے اور سوشل میڈیا پر اس کی ویڈیو وائرل ہو رہی ہے ۔ وائرل ہونے کی ایک بڑی وجہ یہ ہے کہ اداکارہ نے ایک مذہبی اسکالر اور مفتی سے شادی کی ہے ۔ بالی ووڈ کی تاریخ کا یہ پہلا موقع ہے جب فلمی دنیا کی کسی ہستی کی شادی کسی مولوی سے ہوئی ہو ۔ ثناخان نے کچھ دنوں پہلے بالی ووڈ کو الوداع کہہ دیاتھا اور مکمل طور پر فلمی دنیا سے اپنا رشتہ ختم کرنے کا اعلان کردیا ۔ سوشل میڈیا اکاؤنٹ پر ثنا خان نے ایک مضون لکھ کر اطلاع دی اور وجہ بتائی تھی کیوں انہوں نے فلمی دنیا کو الوداع کہہ دیا ہے۔ اس کے بعد ثناخان نے سوشل میڈیا پر ویڈیو کے ذریعہ اسلام کی تبلیغ شروع کردی ۔ نماز کے فوائد ۔ روزے کے فائدے ۔ نماز پڑھنے کا طریقہ کیاہے ۔ ا س طرح کی ویڈیوز بھی انہوں نے اپنے انسٹاگرام اور ٹوئٹر پر پوسٹ کی ۔ آج ایک مرتبہ پھر وہ سرخیوں میں ہے اور سوشل میڈیا پر نو منٹ کی ایک ویڈیو وائرل ہورہی ہے جس میں ایک مولانا کے ساتھ وہ شادی کے جوڑے میں زینہ سے اتررہی ہیں ۔ تفصیلات کے مطابق ثناخان نے گجرات کے شہر انکلیشور کے ایک عالم دین مفتی انس سے شادی کرلی ہے ۔تبلیغی جماعت سے وابستہ مولانا احمد لاٹ صاحب نے ان کا نکاح پڑھایا ۔ نکاح کی تقریب میں مولانا کلیم صدیقی بھی موجود تھے ۔ وائرل ویڈیو میں ایک اور خاص بات یہ ہے کہ ثنا خان نے شادی کے دن ہندوستانی تہذیب کے بجائے عرب اور مسلم ملکوں کی تہذیب پر عمل کرتے ہوئے سفید جوڑا پہناہے ۔ ہندوستان اور پاکستان میں شادی کے دن دلہن عام طور پر سرخ رنگ کا جوڑا پہنتی ہیں ۔ دوسری طرف سعودی ،عرب ترکی اور دیگر مسلم ملکوں میں شادی کے موقع پر دلہن سفید رنگ کا جوڑا پہنتی ہیں ۔ ثنا خان نے بھی شادی کے دن سرخ رنگ کا جوڑا پہننے کے بجائے سفید رنگ کا جوڑا پہناہے ۔ یہ شادی سادگی کے ساتھ ہوئی ہے۔ جن کے ساتھ نکاح ہواہے وہ عالم دین اور بزنس میں ہیں ۔ گجرات کے ایک بڑے تاجر گھرانے سے ان کا تعلق ہے ۔ ثنا خان نے ابھی تک اپنے سوشل میڈیا اکاﺅنٹ پر شادی کے تعلق سے کوئی بھی جانکاری نہیں دی ہے ۔ تاہم معتبر ذرائع سے ملت ٹائمز نے اس خبر کی تصدیق کی ہے ۔ اسٹیشن مسجد میں 20نومبر کو یہ شادی ہوئی ہے ۔ 22 نومبر کو ولیمہ کا اہتمام کیاگیا ہے ۔ یہ ویڈیو سوشل میڈیا پر تیزی وائرل ہورہی ہے اوریوزرس دلہا دلن کو مبارک اور دعاء دے رہے ہیں ۔ |
