TELUGU HEROS SIX PACKS - తెలుగు హీరోల సిక్స్ ప్యాక్స్ |
![]() |
తెలుగు హీరోల సిక్స్ ప్యాక్స్
చక్కనమ్మ చిక్కితే అందం అంటారు. అదే హీరోలు సన్నబడితే మాత్రం అతి ప్రత్యేక వార్త అవుతుంది. తెలుగు హీరోలు సహజంగానే బొద్దుగా కనిపిస్తారు. మరీ సన్నగా కాకుండా ఉంటారు. అలాంటి హీరోలందరూ పాత్రల కోసం బరువు తగ్గాల్సిన పరిస్థితి వచ్చింది. తగ్గడం అంటే మామూలుగా కాదు ఒక్కొక్కరు 10 నుండి 20 కేజీల వరకు తగ్గే ప్రయత్నం చేశారు. దీనికి కోసం రోజుల తరబడి కృషి చేశారు. తిండి తగ్గించుకున్నారు. జిమ్ను నమ్ముకున్నారు. జానీ కోసం పవన్ కల్యాణ్ తనబాడీ షేప్ మొత్తం మార్చుకున్నారు. జానీలో క్యారక్టర్ అలాంటిది కాబట్టి సహజత్వం కనిపించేలా జాగ్రత్తపడ్డారు. పైగా ఆయనే ఆ సినిమాకు దర్శకుడు కావడంతో పాత్రోచితంగా కనిపించాలని నిర్ణయించుకున్నారు. జూ.ఎన్టీఆర్ బొద్దుగా ఉండేవాడు. తాతకు తగిన మనవడు అని అభిమానులు ఆనందించేవారు. అలాంటి ఎన్టీఆర్ యమదొంగ కోసం సన్నబడాల్సి వచ్చింది. చిత్ర దర్శకుడు ఎస్.ఎస్. రాజమౌళి సూచన మేరకు మూడు నెలలు కష్టపడి తన భారీ పర్సనాలిటీని ఒక షేప్కు తెచ్చుకున్నారు. యమదొంగ చూసిన వారెవరికైనా జూనియర్ బావున్నాడు అనిపించింది. ఒక వైపు రాజకీయాల్లో యమబిజీగా ఉన్నప్పటికీ మెగాస్టార్ బాడీ మెయింటెన్ చేయడంలో అశ్రద్ద చేయరు. అందుకే ఆయన గడచిన నలభై ఏళ్ళుగా ఒకే తీరుగా కనిపిస్త్తున్నారు. అయితే మధ్యలో కొంత బరువు ఎక్కువైనట్టు కనిపించారు. దాంతో ప్రత్యేక చికిత్సతో సన్నపడ్డారని సన్నిహితులు పేర్కొన్నారు. కమేడియన్ సునీల్ ఎలా ఉండేవాడో తెలిసిందే. అలాంటి పర్సనాలిటీతో హీరోగా నటించడం కష్టం. ప్రేక్షకులు ఆదరించకపోయే ప్రమాదం ఉంది. అందుకే సునీల్ ఏకంగా సిక్స్ ప్యాక్ కమిటయ్యాడు. బరువు తగ్గడమే తన తక్షణ కర్తవ్యంలా భావించి కష్టపడ్డారు. మంచు విష్ణు సైతం తన బాడీ బాగా తగ్గించుకున్నారు. ఆ తర్వాత నటించిన చిత్రాల్లో ఈ వ్యత్యాసం స్పష్టంగా కనిపిస్తుంది. ఇక ఐ సినిమా కోసం నటుడు విక్రమ్ దాదాపు యాభై కేజీల బరువు తగ్గి అందరినీ ఆశ్చర్య పరిచాడు. నటీనటులకు తమ శరీరమే పెట్టుబడి. అందంగా కనిపిస్తేనే ఆదరిస్తారు. కొంచెం లావెక్కినా ప్రమాదమే. ఈ విషయంలో కచ్చితమైన డైట్ పాటిస్తారు. ప్రతి రోజు వ్యాయాపం తప్పనిసరి. ఇక తిండి విషయంలో ఎన్నో పరిమితులు ఉంటాయి. వాటిని కచ్చితంగా ఫాలో అవాల్సిందే. చేతి నిండా డబ్బు, తినడానికి అన్నీ అందుబాటులో ఉన్నప్పటికీ మితహారమే తీసుకోనక తప్పదు. కొందరు ఆర్టిస్టులు లావు తగ్గడానికి లైపో చికిత్స కూడా తీసుకుంటున్నారు. అయితే ఇది క్షేమకరం కాదని, దీనివల్ల మరికొన్ని ఇబ్బందులు తప్పవని అంటున్నారు. |